السلام عليكم ..

على قد ما يعجبوني الناس اللي يفهمون في العطور ويفرقون بينها أنا للأسف ماني وحدة منهم أبداً ،، أنا إنسانة أحب أمسك في عطور معينه واذا خلصت أرجع أشتريها ،، وما عندي أي إهتمام أغيرها أو أبحث عن الجديد الا لو مسكت في واحد جديد صدفه
رح أتكلم عن كل عطر وأحاول أوصف لكم الريحة قد ما أقدر 🙂

خلونا نبدأ 🙂
 

1

العطر الأول هو Happy Spirit من Chopard هذا واحد من العطور اللي أعشقها من جد ،، عندي قارورتين فاضية منه ما أدري متى برميها لول
ريحته فخمة مره أحب أستخدمة في السهرات أكثر شي ، برضو من العطور الزهرية اللي من مكوناتها الأزهار والفواكة في يدخل في مكوناته المسك والعنبر  وأقدر قول ريحته أقوى من ريحة العطور الثانية.

2

الثاني هو عطر ليدي مليون Lady Million  من Paco Rabanne هذا واحد من أجمل العطور اللي شميتها في حياتي ،، أحب كيف ريحته مميزة مع انها يعني تنفع للسهرات المناسبات الخاصة وكذا مع ذلك ناعمة وانثوية  .
هو يندرج تحت العطور الزهرية يعني ريحته أزهار على فواكة وحمضيات ، عشان كذا هو غالباً مناسب للأجواء الصيفية أكثر .
كمان عاجبتني علبته فوق ما تتصورون مرا فخمة ، أزكر مرا اشتريته لصاحبتي مع اللوشن بنفس الريحة جا في علبه زي الخزنه الذهبية شكلها فخم وحلو كهديه

يمكن من الوصف تحسون ان الروايح متشابهة لكنها مختلفة عن بعض تماماً ،، روحو أقرب محل عطور وشموها وبتفهمون قصدي

3

العطر الثالث للإستخدام اليومي ،  Incredible  من  Victoria’s Secret حرفياً والله كل ما رحت فيكتوريا سيكريت إشتريته
 هذا العطر برضو يدرج تحت العطور الزهرية ،، بس لما قريت مكوناته زهور خااالصة فيها مسك و بعض الروايح الخشبيه بس أحس مو باين منها الا ريحة الأزهار ، بارد وانثوي وخفيف أخواتي يستخدمونه لدوام الجامعة
أحس مناسب لبنات الجامعة والدوامات أكثر شي حتى كمان سعره مناسب لهم بحدود 150 ريال عبوة حجم 100ml , وأنا اشتريته من التخفيضات مرتين ب 75 ريال ،، في أحسن من كذا !!

بالنسبه للأسعار والله ما أتذكر بالضبط للأسف ، وفي عطور تعجبني غيرها أكيد زي عطر Chanel Coco Mademoiselle  وكمان Carolina Herrera  212 VIP . بس حبيت أذكر العطور اللي اشتريها كل ما خلصت في هذا البوست وفعلاً العطور اللي فوق كلها أقل شي خلصت منها قارورتين أو ثلاث وليسا رح أشتريها لو خلصت إن شاء الله .

وانا أكتب هذا البوست اكتشفت انو العطور الزهرية تعجبني أكثر من غيرها .. انتو ايش العطور المفضلة عندكم ؟؟ اكتبولي في التعليقات  واتبعوني على تويتر وانستقرام  ar_stylish@