السلام عليكم

قريت قبل فترة اقتباس يقول ” الموضة هي ما يعرض 4 مرّات كل عام , الستايل هو ما تأخذينه من هذه الموضة ”
هذا الإقتباس اختصر كتب في رأيي .. يعني أكيد لكل وحدة فينا رأي وستايل خاص فيها ممكن أنتي يجذبك شي في عرض أزياء معين أكون أنا ما شفته ولا حتى انتبهت له .

كثير بنات يقولون انهم ما يعرفون كيف ينسقون طلّة كاملة أو ما يعرفون ينسّقون الألوان سوا .. في هذا الموضوع أبغا اذكر بعض النصائح اللي ممكن تساعدك تحددي ستايلك وتكوني مرتاحة فيه بدون ما تقلّدي أحد أو تنسخي ستايل مو ستايلك وما يعبّر عنك
هذي الطريقة ساعدتني كثير وأتمنى انها تساعدكم انتو كمان …

نبدأ

1- ابحثي عن الإلهام :

دوّري على صور تعجبك سواء صور عروض أزياء ,طلأت النجمات أو ستريت ستايل , جمعيها في ملف في جوالك أو في الكمبيرتر أو حتى قصصي صور أو أطبعيها وجمعيها في دفتر أو على لوح كبير .
اختاري صور عجبتك لأي سبب كان سواء بألوانها أو بطريقة لبسها .. أي صورة رسمة بسمة على جهك رح تعطيك الهام تنسقي طلّة جميلة في يوم من الأيام ..
موقع Pintrest ممكن يساعدك في هذي الخطوة .. هو فكرته مأخوذة من لوح الإلهام تقدري تبحثي في الموضوع اللي يعجبك وبعدين تضيفي لصفحتك الصورة اللي نالت اعجابك  هذي صفحتي فيه اتبعوني هناك 3> Ar_stylish

2- خذي صور :

اذا لبستي وقبل ما تخرجيين من البيت القطي صورة لطلّتك .. بعدين شوفيها على رواقه أسألي نفسك ايش حتغيّري فيها وايش أكثر شي عجبك فيها ؟ هذي القطعة اللي انتي لابستها ينفع تتلبس مع شي ثاني في دولابك ؟
بهذي الطريقة رح تطلّعي تنسيقات جديدة لنفس القطعة اللي كنتي لابستها ورح تساعدك كمان تعرفي ايش اللي يناسب جسمك وايش اللي ما يناسبه .
أنا اذا طفشت ما أدري ايش يجيني >< أقوم ألبس واتزبّط وآخذ صور .. بعدين لمّا أشوفها اكتشف اني ممكن أبس نفس القطع بطريقة جديدة .. عشان كذا أنصحكم لا تستهينوا بهذي الخطوة

chriselle lim

3– اعرفي شكل جسمك :

أحياناً بنات يسألوني ايش يناسب البنات المليانات ؟ لازم تعرفو أن كله يعتمد على شكل الجسم سواء كنتي نحيفة أو سمينه شكل جسمك هو اللي يحكم .. المصمم مايكل كورس قال نصيحة حلوة وهي انك اذا ماعرفتي تحددي شكل جسمك شوفي أحد من النجمات بنفس رسمة جسمك أو قريبة منها وهذا رح يساعدك تختاري الأشياء اللي تناسب شكل جسمك .

4- التريندز مهمه بس راحتك أهم :

الموضة تتغيّر يومياً , تظهر أشياء جديدة وتطغى على أشياء كانت دارجة أمس كيف ممكن تلحقين عليها ؟ ابحثي عن الجديد وفكّري بطرق مختلفة إنك تلبسينها واذا ما ناسبتك دوري غيرها . مو ضروري تفرضين الموضة الدارجة على ستايلك بهذي الطريقة ما حترتاحي باللبس اللي انتي لابسته .. اذا عجبك التريند وناسبك البسيه ماعجبك في غيره كثير .
التنورة التول من الأشياء اللي عجبتني جداً هذا الموسم .. شكلها كيوت وألوانها جميلة غالباً بس للأسف ما تناسبني أبداً مهما حاولت اتخيل نفسي لابستها ما أقدر عشان كذا مستبعدتها كليا :”(

5- لا تستغني عن القطع الأساسيّة:

قطع أساسيّة زي الفستان الأسود القصير أو القميص الأبيض أو الجاكيت الرسمي زي الصورة لا تخلينها تختفي من دولابك . هذي القطع مهمّة مهما كان ستايلك .. ستايلك هو اللي يحدد انتي كيف تلبسينها ..
هذي القطع رح تساعدك تبدأين تنسقينها في أكثر من لوك أو طلّة مختلفة وممكن منها تنتقلي لقطع ثانية وتتعلّمين تنسّقينها بنفس الطريقة .



wendyslookbook

لازم تعرفي حاجه مهمّة .. انك تخلقي ستايلك الخاص فيك ما يتطلب انك تلبسين ماركات غالية أو تعرفي أسماء كل المصممين وتكوني مطلعة على آخر المجموعات , هذي كلها أشياء اضافيّة تقدري تستغني عنها أهم شي إنتي يعجبك ستايلك و تكونين مقتنعة ان لبسك حلو حتى لو ما عجب أحد ..