إيش صار في أسبوع الموضة في نيويورك 

أكيد كلكم كنتو متحمسين لأسبوع الموضة في نيويورك مثلي ، وإذا كنتو تتابعون العروض اللي صارت أتوقع انكم زيي حسيتو انكم تحمستو عالفاضي . 

للأسف العروض خلال هذا الأسبوع انقسمت لقسمين ، الأول كان تجاري نوعاً ما وقدم شي معتاد ومتوقع ومافي شي يحمس، والنوع الثاني كان مجرد حدث للسوشال ميديا و الضجة الإعلامية لا أكثر، قررت إن هذا البوست حيكون لأبرز العروض اللي أقيمت في هذا الأسبوع ورح أعرضلكم صور منها عشان تقيمونها معايا.

حاولت أذكر الأبرز وغيّبت كثيرين، ما أنكر ان بعضهم كانت عروضهم جميلة بس مافي مجال لذكر الكل فقرر اذكر الأميز. 

FENTY PUMA by Rihanna

ريانا قدمت مجموعة تصاميمها لماركة بوما، أقدر أقول إنها تفوقت على كانييه ويست اللي شفنا في عرضه كل شي الا الأزياء (تفاصيل عرض كانييه هنا) ،الأزياء في هذا العرض كانت رياضية و شبابية، وحبيت انها عرضت فساتين كمان ضمن هذي المجموعة. 

Jason Wu 

هذا العرض يعتبر بداية أسبوع الموضة، اللي يعجبني في تصاميم جايسون وو انها بسيطة و ناعمة ،مع ذلك تحمل بصمته . هذي المجموعة ما كانت مميزة ، و ما أقدر أقول ان هذا العرض كان أجمل عروض جايسون وو لكن من ناحية ثانية كان جميل وماحد ينكر هذا الشي. 

Monique Lhuillier

حسيت مجموعة مونيك لولييه في هذا الموسم ما كانت تشبهها ، تعودت منها الفساتين الناعمة و اللي مافيها تفاصيل كثير بس فاجأتني في هذا الموسم، قدمت مجموعة جميلة فيها حياة طبعات و ألوان ملفتة بعّدت عن الأسلوب البسيط اللي يطغى على تصاميمها.

Altuzarra

جوزيف آلتوزارا من المصممين اللي انتظر عروضهم كل موسم، تصاميمه في هذا المجموعة كانت ايدجي نوعاً ما ويمكن تكون طريقة تنسيقها لعبت دور بهذا الشي، أجمل قطعة في عرض آلتوزارا كان آخر فستان في العرض، قدّم ألتوزارا فستان ترتر رائع تحمست أشوفه عالسجادة الحراء. 

Prandon Maxwell 

المصمم عرض مجموعته الكاملة بالأبيض و الأسود واستغنى عن حضور الألوان، بس بالمقابل ركّز على التصاميم الجميلة و القصات الهندسية وهذا برأيي اللي خلّا المجموعة مميزة. أنا بصراحة خقيت على التوب الأبيض. 

Cushnie et Ochs

كمية الجمال في مجموعة كوشني ات أوكس مو طبيعية، عرضو مجموعة رائعة من الفساتين السوداء القصيرة و حصور مجموعتهم في الألوان الحيادية اللي هي الأبيض والأسود و اللحمي مع اللون الأحمر اللي برز في بعض الفساتين في النهاية. 

Oscar De La Renta 

مصمم الدار الجديد أثبت موقفة في هذي المجموعة، لمسة أوسكار دي لا رينتا المميزة مازالت موجودة مع تفاصيل عصرية وجميلة، حسيت بعض الفساتين في البداية كانت عادية بس حبيت القفازات ، حسيتها أضافت شوية جرأة للفساتين. 

Delpozo 

من أجمل العروض هذا الموسم ،، أكثر شي عجبتني الشنط كانت فعلاً رائعة. الملابس كانت مميزة وجميلة وجمعت بين الطابع التجاري اللي غلب على كل عروض هذا الأسبوع و بين الكرييتيفتي و الإبتكار الي كانت غايبة وما شفناها.

Marc Jacops 

مارك جاكوبس مشى على الطريق الإبداعي في آخر عروضة، أول ما تشوفون الصور رح تقولون يمزح ، بس ركزو أكثر في القطع و الفساتين . بعض القطع كانت فعلاً مميزة وجميلة بالنسبة لي منها الكايب المطرز الطويل مثلاً 

ملاحظة: شوفو الفستان الأسود الطويل تتوقعون يناسب ليدي غاغا لو حتحضر الأوسكار؟ أتوقع تختار أحد تصاميم مارك جيكوبس لو حتحضر بما انها كانت وحدة من العارضات في عرضه 

Photos by: Imaxtree