في الفترة الأخيرة كلنا لاحظنا التنقلات الكبيرة اللي صارت في عالم الموضة ، دور كبيرة قاعدة تستغني عن مصمميها وتحط مكانهم مصممين شباب و أصحاب فكر مختلف عشان يحطون لمستهم الشبابية ويغيرون الدماء في التصاميم المعروضة .
من أكبر التغيرات اللي صارت في السنتين الأخيرة وأكبرها هو ماركة Louis Vuitton اللي شالت مارك جيكوبز بعد 16 سنه وحطت مكانه نيكولا غيسكيير ، وما نقدر نقول إن هذا التغيير كان سلبي بعد ما شفنا المجموعات اللي قدمها نيكولا خلال هذا العام حتى إنه فاز مؤخراً بجائزة أفضل مصمم عالمي في حفل British Fashion Awards . وما ننسى كمان إن نيكولا غيسكيير هو بنفسه كان مع Balenciaga  لمدة 15 سنة .

Blalenciaga  اللي تركهم غيسكيير قررو يجيبون دماء جديدة للدار و يختارون مصمم شاب عشان يحل محله ، ووقع إختيارهم على أليكساندر وانغ اللي بهرنا إلى الآن بمجموعات رائعة .

أوسكار دي لا رينتا قبل وفاته بأيام أعلن عن إختيار بيتر كوبينغ – مصمم ماركة Nina Ricci السابق – كخليفه له و أعلنت الدار أن كوبينغ اللي يتمتع بنفس اللمسة الأنثوية اللي عرفنا فيها أوسكار دي لا رينتا رح يشتغلون سوا على المجموعات المقبلة ، بس للأسف الأسبوع اللي بعده أعلن خبر وفاة دي لا رينتا .
و بالنسبة لماركة Nina Ricci اختارت Guillaume Henry المصمم السابق لماركة Carvin كبديل لمصممها السابق .

من التنقلات المفاجأة اللي صارت كمان إنفصال ماركة Hermes عن مصممها كريستوف لومير وحلت محلة المصممة  Nadège Vanhee-Cybulski اللي اشتغلت سابقاً في دور كبيرة زي Celine و Margiela و The Row  ، و ماركة Hugo Boss إختارت جايسون وو كمصمم إبداعي لها . وآنتوني فكاريلو اللي مسك ماركة Versus من Versace . و أهم واحد جون غاليانو اللي وأخيراً حتنكتب له عودة لعالم الموضة مع دار Margiela بعد ما فصلته Dior عام ٢٠١١ بسبب تعليقات معادية للسامية ونبذ وقتها من عالم الموضة كلياً.

آخر هذي التنقلات المفاجأة من ماركة Gucci  اللي فاجأتنا هذا الأسبوع بخبر انفصالها عن رئيسها التنفيذي باتريسيو دي ماركو و زوجته المصممة فريدا جيانيني بسبب التكرار في التصاميم وعدم إقبال الزبائن على Gucci . بس إلى الآن ما أعنت الدار عن المصمم البديل ، الإشاعات اللي طالت هذا الموضوع كثيرة بعضها تقول إن ريكاردو تيشي حينفصل عن ماركة Givenchy و يمسك Gucci . وكمان المصمم جوزيف آلتوزارا و المصمم البريطاني كريستوفر كاين من المرشحين لهذا المنصب .
شخصياً أشوف ألتوزارا الأنسب لماركة Gucci بس الأيام حتكشف لنا المستخبي 🙂

التغييرات اللي صايرة في عالم الموضة كثيرة وهذا اللي خلا سوزي مينكيس تشبهها بلعبة Candy Crush  في مقال كتبته لمجلة Vogue  , هذي التغيرات برأيي مهمة جداً عشات تحرك الدم في عالم الموضة ،، الأستقرار حلو بس بعده يجي التكرار وهو أسوأ شي ممكن يصير لأي دار أزياء .


 إذا حابين تقرأون مقال سوزي مينكس أضغطو هنا