السلام عليكم ..

كلنا نعرف ان المعدل الطبيعي لتساقط الشعر هو من 100-150 شعرة في اليوم .. بس أعتقد إن اللي ينزل من شعري أكثر من كذا بكثير ،، في البانيو ينزل خصل ولما أمشط كمان وأعتقد في بنات كثير مثلي

وصلتني مجموعة علاج تساقط الشعر من Dove ، المجموعة هذي من مميزاتها انها تخفظ تساقط الشعر خلال إسبوعين وبعد ما خلصت الأسبوعين قررت أعمل ريفيو عنها

من ايش تتكون المجموعة ؟

المجموعة الكاملة فيها شامبو وبلسم وماسك مع تونيك للشعر ، وصلتني المجموعة كاملة ماعدا الماسك
الشامبو والبلسم 
للإستعمال اليومي ، إغسلي شعرك بالشامبو و دلكية بالبلسم لمدة دقيقة على الأقل وبعدها اغسليه بالماء .
التونيك
جل شفاف تفرقين الشعر وتدلينه على فروة الرأس النظيفة مباشرة بعد تجفيفها بالمنشفة .

ايش المميز في هذي المجموعة وكيف تعمل على تخفيف التساقط ؟ 


مكتوب على هذي المنتجات انها تحتوي على مركب التربازول النشط مع الجنسنغ وبروتين فول الصويا ، ويعمل مكون التربازول على تثبيت جذور الشعر في مكانها بإحكام ويقلل تساقط الشعر خلال أسبوعين .
هذا المكتوب على العلبة وفي الحقيقة ما قد سمعت عن التربازول فعشان كذا قررت استخدم المنتجات هذي واشوف

كيف كانت تجربتي مع منتجات دوف لتساقط الشعر ؟

قريت على المنتجات انك رح تلاحظين النتيجة بعد أول أو ثاني استخدام ، وبصراحة أنا خلصت العلبة الرابعة أو الخامسة من التونيك ومافي أي نتيجة تذكر ابداً . فكرت أوقف استخدامه بس قلت كلها كم يوم باقية خليني أكمل .
خلصت الإسبوعين وماكنت منتظره أي نتائج بس بعد ما خلصتها لاحظت فعلاً ان الخصل اللي كانت تنزل في البانيو خفت كثير والشعر اللي كان ينزل وانا امشط قل . ما أقول ان شعري معاد يتساقط نهائياً بس التساقط خف وهذي النتيجة مرضية نوعاً ما
ملاحظة – اذا عندك طلعة أنصحك تأجلين استخدام التونيك لبعد ما ترجعين لأني لاحظت انه يخلي الشعر نايم من عند الجذور .